کراچی، ٹرانسپیرنسی انٹرنیشنل انڈونیشیا کے ایک وفد نے سندھ انفارمیشن کمیشن (SIC) کا دورہ کیا، جہاں صوبے میں سندھ ٹرانسپیرنسی اینڈ رائٹ ٹو انفارمیشن ایکٹ 2016 کے نفاذ، تجربات کے تبادلے اور بالخصوص سندھ کے سرکاری محکموں اور دیگر عوامی اداروں کے پاس موجود معلومات تک شہریوں کی رسائی کو آسان بنانے کے طریقۂ کار اور ضابطوں پر تفصیلی تبادلۂ خیال کیا گیا۔
وفد کا استقبال سندھ انفارمیشن کمیشن کے انفارمیشن کمشنرز محمد سلیم خان اور نور محمد دایو اور ایگزیکٹو ڈائریکٹر ذوالفقار علی شیخ نے کیا۔
وفد میں ٹرانسپیرنسی انٹرنیشنل انڈونیشیا کی پروگرام آفیسر محترمہ ازا اکبرانی اور پروجیکٹ آفیسر محترمہ گیتا اتیکاہ شامل تھیں، جبکہ ان کے ہمراہ ٹرانسپیرنسی انٹرنیشنل پاکستان کی پروجیکٹ کوآرڈینیٹر محترمہ نسرین میمن، پروگرام ایسوسی ایٹ محترمہ فریحہ فاطمہ اور اسسٹنٹ پروجیکٹ کوآرڈینیٹر افان فہیم بھی موجود تھے۔
ملاقات کے دوران سندھ انفارمیشن کمیشن کے نمائندوں نے مہمان وفد کو سندھ ٹرانسپیرنسی اینڈ رائٹ ٹو انفارمیشن ایکٹ 2016 کی اہم دفعات، کمیشن کے مینڈیٹ اور فرائض، اور شہریوں کی جانب سے صوبے کے سرکاری محکموں اور دیگر عوامی اداروں سے معلومات حاصل کرنے کے طریقۂ کار کے بارے میں تفصیلی بریفنگ دی۔
وفد کو شفافیت، جوابدہی، بہتر طرزِ حکمرانی اور عوام کی معلومات تک رسائی کے فروغ میں سندھ انفارمیشن کمیشن کے کردار سے بھی آگاہ کیا گیا۔
معلومات کے حصول کے لیے درخواستیں جمع کرانے کے طریقۂ کار، مطلوبہ معلومات فراہم نہ کیے جانے کی صورت میں شہریوں کو دستیاب قانونی و ادارہ جاتی طریقۂ کار، اور معلومات تک رسائی سے متعلق شکایات کے ازالے کے لیے کمیشن کے اختیارات پر بھی تفصیلی روشنی ڈالی گئی۔
اس موقع پر انفارمیشن کمشنر محمد سلیم خان نے عوامی اداروں کی جانب سے معلومات کی ازخود فراہمی (Proactive Disclosure) کی اہمیت پر زور دیتے ہوئے کہا کہ حقِ معلومات کے قانون کے تحت شہریوں اور سرکاری افسران کو ان کے متعلقہ حقوق اور ذمہ داریوں سے آگاہ کرنے کے لیے وسیع پیمانے پر شعور و آگاہی پیدا کرنا ضروری ہے۔
انفارمیشن کمشنر نور محمد دایو نے کہا کہ اس ملاقات نے دونوں فریقوں کو حقِ معلومات کے قانونی فریم ورک کے نفاذ اور شفافیت و عوامی رسائی کو مزید مستحکم بنانے کے لیے ادارہ جاتی طریقۂ کار سے متعلق اپنے تجربات اور نقطۂ نظر کے تبادلے کا اہم موقع فراہم کیا۔
سندھ انفارمیشن کمیشن نے ٹرانسپیرنسی انٹرنیشنل انڈونیشیا کے وفد کے دورے کو سراہتے ہوئے شفافیت، جوابدہی اور حقِ معلومات کے قانونی فریم ورک کے مؤثر نفاذ کے فروغ کے لیے ٹرانسپیرنسی انٹرنیشنل پاکستان کے مسلسل تعاون اور روابط کی بھی تعریف کی۔
ٹرانسپیرنسی انٹرنیشنل انڈونیشیا کے وفد نے سندھ انفارمیشن کمیشن کی کارکردگی اور مستقبل کے منصوبوں کو سراہا۔ وفد نے امید ظاہر کی کہ کمیشن کی مسلسل کوششوں کے نتیجے میں سندھ کے عوامی اداروں اور شہریوں میں سندھ ٹرانسپیرنسی اینڈ رائٹ ٹو انفارمیشن ایکٹ 2016 کے حوالے سے آگاہی میں مزید اضافہ ہوگا۔
بعد ازاں وفد کے اراکین کو سندھ کی روایتی ثقافتی سوغات اجرک پیش کی گئیں۔
